Ég er nefnilega ekki búin að gleyma þessu:

Já, ég er dottin í jólagírinn. Gott þegar við Rún fórum í búðarferð um daginn og keyptum slatta af jólabruggi, púrtvín og mandarínur. Svo er frændgarðurinn (nafnið sem amma gaf sambýlinu) búinn að bjóða í heljarinnar fyrir-jólaboð á fimmtudaginn. Ákváðum það í kjölfar þess að Rún og Sóley löguðu til í frystikistunni þar sem kenndi ýmissa grasa. Eða kjöts öllu heldur. Stefnum á hreingerningu og skreytingu fyrir boðið. Gaman gaman. Alveg búin að ná sambandi við jólabarnið í mér eftir jólapásuna í fyrra. 

Fyrir ári síðan var ástandið svona.

Eins gott maður steig ekki skrefið til fulls og gerðist múslimi í Kuala Lumpur (eða KayEll eins og við kölluðum borgina til að vera svalar). Þá væru engin jólin.

Bið að heilsa.

Annars er ég góð, fagna því að hitastig hefur lækkað og maður getur kúrt sig inn í úlpu og húfu á leiðinni í skólann. Svo reynir maður bara að skrifa eins og morgundagurinn sé enginn. Samtals tæpar 50 blaðsíður sem ég þarf að skila á fyrstu 2 vikunum í desember. Þrjár ritgerðir sem allar fjalla um mjög ólík efni svo ég þarf að kafa mikið í alls kyns bækur og fræðiefni. Sem er alltaf gaman. Verðlaunin eru líka ekki af verri endanum. Jólafrí frá 14. des til 10. jan ef ég man rétt. Einhver öfund í gangi eða? Samt pínu hættulegt því listinn yfir það sem ég hef ekki tíma til að gera núna og ætla að gera í jólafríinu lengist sífellt. Endar líklega með því að ég komi engu í verk eins og oft hefur gerst. Sjáum til. Ætti kannski að birta listann opinberlega eins og ég gerði einu sinni minnir mig og þá kannski verður mér eitthvað úr verki.

En þessar ritgerðir verða ekki skrifaðar á blogginu, það er nokkuð víst.

Held það sé kominn tími á að hafa mynd dagsins af Margréti Helgu þar sem hún átti stórt merkisafmæli í gær og ég fékk að borða yfir mig af krásum af því tilefni. 

Ef hún er ekki bara yfirmáta svöl og heimsborgaralega á þessari mynd þá veit ég ekki hvað. 

 

Vaknaði svo með þeim fyrstu í morgun. Labbaði í bæinn áður en birti og fékk mér morgunkaffi á Kaffitár áður en fólk mætti með tjúlluðu börnin sín. Svo gott að eiga svona rólega morgunstund. Gluggaði þar aðeins í Moggann sem ég hef ekki gert lengi. Og átti bara ekki til orð. Þetta var laugardagsblað og engin Lesbók. Hélt kannski að einhver hefði stolið henni úr en sá þá að það er búið að gera einhvern svona spes sunnudagsmogga í nýju útliti sem kemur út um leið og laugardagsblaðið (tilgangurinn hver?). Og Lesbókinn er bara aftasti parturinn af þessu blaði. Ég man þegar ég var áskrifandi fyrir nokkrum árum þá tók ég alltaf Lesbókina út og geymdi þar til síðast og las hana svona sér. Stór kostur var nefnilega að hún var sér. Ef ég væri enn þá áskrifandi væri ég líklega brjáluð yfir þessari breytingu. Sakna þess nú pínu að sitja í græna sófanum mínum (sem endaði því miður hjá Góða hirðinum í haust, vona að einhverjum líði vel í honum í dag), með rauða kaffibollann minn (sem er í kassa fyrir norðan) og lesa Lesbókina. Og drattast svo upp á Bókhlöðu. 

Nú er svo komið að í raun er ekkert blað sem mig virkilega langar til að fletta. Burtséð frá he who shall not be named þarna á Mogganum, þá fannst mér blaðið betra fyrir nokkrum árum en það var í sumar. Kemur reyndar fyrir annað slagið að það eru viðtöl og greinar í Fréttablaðinu sem mig langar til að lesa en það er ekki mjög oft og þegar það gerist finnst mér umfjöllunin yfirleitt of stutt. Ég hef líka reynt að finna netmiðil sem ég nenni að lesa en er búin að gefast upp, þar ægir öllu saman og fjallar yfirleitt um spillingu og baknag um hina og þessa. Eina blaðið sem ég les alltaf núorðið er Skarpur en hann er stuttur og bara einu sinni í viku. Versta er að þetta hefur leitt til þess að ég er hálfvegis dottin útúr. Veit ekki alveg hvað er að gerast. Og þá er ég ekki að tala um stjórnmál og fjármál. Ég hef hvort sem er aldrei nennt að lesa um það. En dægurmál og menningu og hversdagslíf, góð viðtöl og metnaðarfulla umfjöllun, langar mig að lesa en finnst ég eiginlega ekki geta það. Nema kannski að einhverju leyti í Fréttablaðinu. Og kannski þessum asnalega sunnudagsmogga ef ég myndi gefa honum séns, get bara ekki hugsað mér að gefa honum séns. En mig langar ekki nógu mikið að lesa Fréttablaðið til að nenna að hlaupa niður á morgnana og sækja það til að hafa með morgunkaffinu. Ég vildi samt að það væri til blað sem lætur mig langa til að hlaupa niður og sækja það. Ég myndi meira að segja kaupa það, einu sinni fannst mér þess virði að borga fyrir Moggann. Stjáni bró segir þess virði að kaupa DV en mér finnst það aðeins of lítið og koma sjaldan og líka alltaf pínu illa við þessa fyrirsagnapólítík hjá þeim. Annars ágætis greinar þar af og til

Hana nú sagði hænan og lagðist á bakið. Veit ekki hvaðan þessi þörf fyrir að tjá mig um þetta kom en þetta bara gerðist. Ég sem ætlaði að hlífa þessari síðu við neikvæðni heimsins á nýjum tímum.

Og það er komið laugardagskvöld og ég veit ekki alveg hvað ég á að gera í því. Kannski einn julebryg. Vel gert hjá mér að kaupa þrjár kippur í fríhöfninni, halda að ég sé búin með þær og finna svo eina í geymslunni.

Segjum við þá ekki bara prost?! Og til hamingju með afmælin Margrét Helga, Fjóla Dröfn og Hákon Logi.

Og þessir Nojarar eru að æsa upp í mér öllöngun...

Annars er maður þá búinn að fara til Noregs og gera það gott. Helstu afrek voru: úlpukaup, bjór með Agnesi, víkingaskipaskoðun, óperhússkoðun, þjóðminjasafnskoðun, Ópskoðun (enginn reyndi að stela því), styttuskoðun (reiða barnið innifalið), náin kynni af norsku sjónvarpsefni (innifalið að sjá einn þaðan berum augum á strætóstoppi daginn eftir, ekki bara Ísland sem er lítið), fara upp í hæstu hæðir þar sem var smá snjór og drekka heitt kakó með rjóma í bjálkakofa með útsýni yfir borgina, borða mikið og drekka kaffi, bjór og rauðvín. Og vart þarf að taka fram að auðvitað var ástkær systir mín innifalin í öllum þessum afrekum. Nokkuð gott bara á þremur dögum þykir mér. 

Er samt alveg að klikka á að hafa mynd úr ferðinni tiltæka til að birta með. Svo mynd dagsins er frá því við systur vorum síðast saman í Osló en það eru nánast akkúrat 3 ár síðan. Við fórum einmitt aftur á þetta sama kaffihús þar sem við fengum okkur samskonar latte og Gunna bergir á hér. Þar hafði ekkert breyst á þremur árum sem var gott.

Allavega, hafið þetta með endurnar í huga ef ykkur leiðist.

Bæ.

Flúði að heiman þar sem að til stendur að horfa á einhvern voðalegan fótboltaleik. Enda búin að vera í kæruleysi í tvo daga sem gengur ekki. En var þó mjög gaman. Gærdagurinn var svona fullkominn Reykjavíkurlaugardagur. Bröns með Jóastelpunum og svo gengum við um miðbæinn og skoðuðum mannlíf og búðarglugga. Villtumst inní nokkrar búðir líka. Meðal annars Kron þar sem ég loksins þorði að spyrja hvort eitthvað af barnaskónum væri til í 35. Gekk svo út með hina fullkomnu skó. Skóna sem ég hef leitað að í marga mánuði. Á tungunni og ofan í þeim stendur einmitt "Camper for Kids." Sætt. En sambærilegir skór fyrir fullorðna kosta rúmum 15.000 krónum meira og ég hefði náttúrulega aldrei keypt þá þó ég hefði passað í þá. Kemur fyrir að smæðin borgar sig. 

Mynd dagsins er af augljósu tilefni. Tekin á góðri stundu í Jóa heima hjá Kristjönu fyrir rúmu ári síðan. Í klúbbinn þessa dagana vantar þó vitaskuld Helenu sem flutti bara til Englands á haustdögum eins og ekkert væri. 

 

Sé ekki betur en það rjúki úr herlegheitunum.

En mynd dagsins er sumsé tekin kvöldið áður en við fórum (á morgun er sem sagt ár síðan). Komnar í náttfötin heima hjá Imbu og Sæju og ég aðeins að sýna Helenu hvernig þessir bakpokar virka. Enda var ég þá sú okkar sem hafði reynsluna. Helena lítur þó ekki út fyrir að hafa mikla trú á mér.

Annars þarf maður að fara að hundskast undan sænginni og smella sér í gírinn. Afmælispartýgírinn alltsvo. Hún á nefnilega afmæli í dag hún Brynja og hefur ákveðið að blása til veislu af því tilefni. Fólk svolítið að eiga afmæli í október finnst ykkur ekki?

Mynd dagsins er því að sjálfsögðu af afmælisbarninu á góðri stundu á mærudögum '08.

Á til alveg fullt af myndum og mér finnst svo leiðinlegt þegar þær þurfa að hanga inní einhverri möppu á tölvunni og gera ekki neitt.

Fyrsta myndin er til heiðurs aldraða afmælisbarninu í Ósló sem átti afmæli síðast liðinn sunnudag. Myndin er tekin á þarsíðustu jólum á B18 og útskýrir um leið hversvegna stóra systir mín er fyrirmynd mín í því að vera kúl.